En mai 2004, à l'Avenue André Grégoire

Vunou â monde lu 7 du djulèt' 1976, dj'à crèhou è Francortchamps, pwis à Stâv'leû, d'vins l'province du Lîdje, â pîd dès Hôtes Fagnes. Spôrts, porminâdes ozès bwès, léhèdje du bédés, moûv'mints d'djônèsse, dèssin èt èco sacwantès-aktivités à costé du l'sucole ont rimpli mès-après cwatre eûres èt mès wékens. Dju r'grète du n'nin aveûr sutou assez sûti po passer pus du timps avou mès grands-parints ki djâzint turtos walon. Camil' Djâspâ èsteût d'alieûrs on scriyeû fwèrt k'nohou. Il èst mwèrt è 1989.
Après lu s'gondère à Sint-R'mâke, wice ku dj'passa sur'mint trop d'timps à aprinde lès mat' èt lès syinces, j'attake - c'èst por bièsse avou - lu liçance è Fizike, à l'Univèrsité d'Lîdje. Mins d'çoulà, i n'dumeûre pus âdjoûrdu k'one clapante pasiyon po l'astronomie ca l'dèssin me f'zéve tofér du l'oûy dusmètant ku d'm'anoyeû à m'èmacraler d'vins siyincieûs calculs â long do djoû. Si bin k'è meûs d'dècimbe, dju tchûza d'adand'ner l'Fizique po m'tchôkî abèye (ca n'faléve nin piète one an.nèye!) d'vins l'Comunicâçion ("lu hûtième seksion", come on l'louméve adon à Lîdje)... Et dj'moussa foû come journalisse è 98. D'vins cisse djèrin.ne an.nèye, dusmètant ku dj'grabouyéve dèdjà d'vins lès gazètes du l'Fèdèrâçion dès-Etudiants èt po l' Parlumint Djônèsse, dju hapa l'ocâsion du rèscontrer lès "grands" caricaturisses avou m'Mémwère so l'caricatûre en Comunôté francèse. Ciste ovrèdje bin pratique ku dj'finiha è 98 fouri mèdayé d'on "prumî pris" do CLIRP (Cerk Lîdjeû d'Infôrmaçion èt du l'Communicâçion). L'univèrsité l'prinda même po mète so pîd on grande èkspôziçion, "Coups de crayon" (Lîdje, à l'BBL, mârs-apri 2000), to m'mètant so lès brèsses one bone pârt du l'organizâçion! Adonpwis, dju prinda on "an.nèye sabatique" po voyèdjî, viziter dès-afères hare èt hote, moussi foû, aprinde l'al'man, cwèri d'l'ovrèdje...! Po fini, è meûs d'awoût' 1999 - sins mây aveûr sûcrî on-ârtike du gazète, mins quasi sin mây aveûr chômé! - dju m'mèta à m'prôpe conte come "dèssinateûr" èt "jardinî" (ca â k'mince, çu n'èsteût nin âhi èt dj'inméve bin d'ovrer â l'ouhe). Mins ratemint, j'ouri dès k'mandes po dès magazines èt totes sôres du publicâçions come Le Soir Illustré, èt Le Jour/Le Courrier,du Vèrvîs...

Asteûre, après sète an.nèyes d'ovrèdje, dju fé tofér dès p'tits dèssins po lès gazètes d'interprihes èt d'a.s.b.l :dèssins po rîre (k'on loume "cartoon" âdjoûrdu), postèrs, grafismes fêts avou l'ordinateûr, dèssins po lès-èfants, logos,... Dj'a dès clients tot-avâ, minme ad'foû do payis. On pout vèye tot çoulà so l'site intèrnèt dessindepresse.com.
One ôte du mès aktivités èst d'aler fé dès p'tits dèssins an direke ozès grands rassonl'mints dès sociètés, po tchôkî on pô djôye duvins cès rèyunions wice k'on n'djâze mây ku d'çanses, du produktivité èt d'dèv'lop'mint : I gn-a dès côps k'c'èst po fé dès caricatures dès djins d'vins one fièsse d'enterprihe po k'lès djins s'plêhèt bin èt s'èralèt avou on p'tit cadô. (po çoulà, vèyoz http://www.cartoonevent.com).
Anfin, dj'inme bin l'histwère du m'payis èt saveûr kî èstint mès tâyes, wice k'is-ont d'manis èt kumint is vikint. C'è-st-insi k'dju m'plêt co bin r'fé lès vihes fotos, à l'nèti, ènnè fé dès dobes, à lès sâver cwè. (vizitoz m'treûzîme site : http://www.photolifting.com).

Pou çou k'èst dès saveûr pus' so lès dèssins, lu mî d'tot èst du s'porminer so l'site èt d'clikî so tos lès lyins. Po m'rèscontrer adon, c'è-st-one ôte afère ca duspôye lu meûs d'oktôbe 2006, dju vike è Portugal wice k'u dj'a rèscontré on crapôde come on 'nnè fé pus... Ele su loume Ana èt ouveûre come dokteûr duvins on-ospital do costé d'Porto. On rawâde k'èle finihe su stadge po ruv'ni èn-Ardène. Mins no èstans co bin an Bèlgike, po lès fièsses (Noyé, lu Laetare,...) èt d'vins cès moumints-là, nos-èstans bin binahe du poleûr taper one atote è walon èt fé raviker come on pout çou ki nos rapèle nos rècinèyes...