Astêr, c'èst mu nom d'ârtisse po Dj'han-Flipe Legrand. Dju so dèssinateûr, caricaturisse, ôteûr èt èditeûr.

Vuni â monde à Vèrvî, dj'à crèhou à Francortchamps (on viyèdje du l' Province du Lîdje) wice ku d'ja stou è scole. Pwis, avou mès parents, mu soûr è mu p'tit fré, on-z-a v'ni à Stâv'leû wice ku dju d'mone todi asteûre. Spôrts, porminâdes ozès bwès, bandes dèssinés, moûv'mints d' djônèsse, dèssin èt èco sacwantes activités djondant du l' sucole ont rimpli mès-après-cwatre-eûres èt mès fins d' samin.ne. I m'ènn'èst du n' nin aveûr passé pus' du timps avou mès grands-parints ki djâzint walon. Camile Gaspârd, lu popa d'à m' mame, èsteût d'alieûrs on clapant scriyeû fwèrt kunohou avâ Treûs-Ponts.. Il a mori è 1990, là k' dj'aveû cwinze ans.

Après dès studes sugondêres à Sint-R'mâke à Stâv'leû, wice ku dj' passa brâmint trop' du timps à-z-aprinde lès mat' èt lès siyinces, dj'a ataké one candi è Fizike, à l' Univèrsité d' Lîdje (ULG adon, asteûre l'ULiège) On-z-èsteût è 1994. Mins d' çoulà, i n' dumeûre pus k'one clapante passion po l'astronomîye, ca dj' tapa djus après treûs meûs ! An-n-èfèt, lu dèssin mu f'zéve tofèr du l'oûy dusmètant k' so lès hames du l' prumîre candi (k'èsteût câzi comeune avou lès cis ki lûgnint vès l' Liçance an mat'), dju m' kubroyéve lu tièsse so dès-afêres brâmint trop complikés por mi èt ki n' chèrvèt vrêmint à rin o l' vèye du tos lès djoûrs! Ça fêt ku, come on-z-èsteût â meûs d' dècimbe èt k' c'èsteût bèrnike po m' rachîr an-ilustrâcion à Sint-Luc, dju r'potcha à hipe s'one ôte cohe, todi à l'Univ adon, à l' Faculté d' Lètes : lu Comunicâçion ("lu ûtîme sèksion", come on d'héve adon) ! Dju r'mèrcihe co l' fème do sièrvice d'ôriyantâçion (Madame Naveau) k' m'a mètou so çusse vôye-là, ca 'lle aveût vrêmint tapé djusse, tot m' duhant ku m' crèyativité pôreût à l' fî chèrvi d'vins l' publicité! Adon, dju m' mèta à l'ovrèdje pé k'on sot, po haper l' trin èn-alèdje; s' one samin.ne, dj'aveû copiyi tos lès coûrs d'à-n-one camarâde du Sint-R'mâke, èt dju ratrapa câzi treûs meûs d' coûrs so lès deûs samin.nes dès vacances du Noyé (po sî coûrs, dès mons, k'on-z-aveût ègzamin an djanvîr) èt pwis co so lès meûs d'après po lès-ôtes coûrs! Çou ki fêt k' dju n' alowa nin one an.né.

So l' timps k'on-z-î èsteût, lès candis ont-st-avou plusieûrs noms : "Arts et Sciences de la Communication", "Sciences de la Communication", "Philosophie et Communication". Por mi, c'èsteût formidâbe : on-z-apurdéve totes sôres d'afêres s'on pô d' tot èt c'èsteût mèye côps pus-âhi k'an Fizike. Sâf ku c'èsteût biès'mint tèorike: on n'a mây apris à t'ni one camèra, à monter dès-îmadjes ou bin mahi do son, ni à-z-intèrviouver, nin minme à "comuniker d'adreût oral'mint", dîreût-dj' bin : hoûter d'adreût, apici lès finèsses do linguèdje, djâzer an public, aveûr lès bonès posteures... I m'avise asteûre ku tot çoulà èsteût wârdé bin catchîmint. Pocwè ? Mètans, po k' lès pus sûtis, lès mîs-ac'lèvés ou lès mîs mètous polèhe prinde du l'avance so lès fis do p'tit peûpe, va... Sins roûvyi k' come tos l's-ôtes, dj'a-st-avou "ne mâle bowé d' cèrvê avou l' filosofîye raçionéle matèrialisse ki, tot v's-aveûlant, vos fêt creûre ku v's-èstoz pus malin k' tot l' monde èt ku lu spirituwalité èst tote bone po lès bièssès djins. Câze du çoulà, dj'a passé à costé d'one sacwè, ki vât mî k' tos lès lîves du filosofîye rèyunis... Mès vât mî nin trop' djâzer d´çoulà volà...

À l' fin dès deûs prumîres an.nés, dju m' dirija vès l' Liçance è Journalisse, çou ki m'avizéve lu pus "sérieûs", djondant dès treûs-ôtes vôyes : muzicolojîye, antropolojîye èt cinèma. Mès cwand k' dj'î r'pinse, dju m'âreû moutwèt mî plêt d'vins l'antropolojîye ou l' cinèma, ca çoulà s' racwède bin avou çou k' dju fê asteûre ! Mès â long dès djoûrs, dju m' duhéve : "Mi, n' mu va nin d' piède mu timps à lére lu gazète, ni à scrîre dès-ârtikes k'a moutwèt nouk ki lès lérè... Çou k' dju vou, c'èst dèssiner ! Lès caricatures ozès gazètes, zèls, su vèyèt à prûmî côp d'oûy èt 'le su léhèt d'on côp !" Pwis, fât tot dîre : dju grabouyéve dèdjà d'vins lès p'titès gazètes du l' Fédération des Étudiants (on-z-aveût one ruvuwe ki s' louméve Lu p'tit torê - pâye à sès cindes! ) èt po l' Parlement Jeunesse (Le 6, rue de la Loi), dusmètant k' à Stâv'leû, on m' dumandéve co bin dès dèssins po 'ne sôre ou l'ôte. I m' fât co conter ku dj'a fêt on p'tit passèdje du kékes meûs an-Anglètère grâce â programme Érasmus' - à l' Coventry School of Art & Design - çou k'a stou one de mès mèyeûses èspériyinces o m' vèye ! (Dju l' ruk'mande à tos les scolîs !) Dj' fouri ossu scolé à l' gazète sôcialisse du Lîdje (La Wallonie), come apurdice, èt on p'tit pô d'vins l' gazète du l'univ (Le Quinzième jour), mès c'èsteût po scrîre dès-ârtikes, nin po dèssiner...

 k'mince du l' dièrin.ne an.né, dj'ataka m' mémwêre. Volà l' tite : Rôle social et de la fonction journalistique des dessinateurs dans la presse quotidienne nationale en Communauté française de Belgique. Come on veût, i n'a rin d'èwêrant ; grâce à Diu, lès profèsseûrs m' lèyint câzi fé à m' manîre, là k'i m'ârint co p'lou holer po ku dju m' rutrôke s'one pus streûte vôye, come c'èst l' môde à l'univèrsité. Mès mi, dju v'léve rèscontrer lès caricaturisses k'ovrint po lès gazètes. C'èsteût 'ne ocâzion du sètchi m' narène foû dès lîves èt d' moussi foû on pô d' Lîdje. Là, dj'a stou malin, mu sonle-t-i : dju n'a nin fêt on-ovrèdje trop tèorike; mî k' çoulà, dj'a stou loukî amon lès "pros", d'vins lès rédacsions ou pus vite d'vins leû-ovreû, po vèy kumint k'i travayèt vrêmint ! C'è-st-adon, par ègzimpe, ku dj'a-st-apris k' onk aléve co bin ozès payis ètrandjîrs po-z-animer dès grands raplous d'intèrprîhes (çou ki d'véve pus târd duv'ni mu spéciâlité...) Anfin, dj' moussa foû avou m' diplome du journalisse - one "Liçance an-Informâcion èt Comunicâcion". C'èsteût è 1998.

Mu mémwêre èsteût moutwè lon du "l' pus grande distincsion" (lu copète do class'mint d'adon) mins i fouri tot l' minme mèdayé d'on "Prumî pris do CLIRP" (Cercle liégeois de l'information et des Relations publiques). Minme su c'èsteût comôde ku ç' seûye mi ki l'apice po dès djins k'avint mèzâhe du mi, on pout dîre ku l'ovrèdje èsteût ruk'nohou, dè mons po s' coté pratike ! Insi, l'univèrsité l' rucwèra po mète so pîd one grande èspôziçion so l' dèssin d' prèsse : Coups de crayon (Lîdje, à l' banke BBL, mâs-apri 2000) tot m' mètant so lès spales lu pus gros bokèt d' l'organizâçion! Avou çoulà èt dès r'prézintâcions azès difèrints Salons d' l'Étudiant, on pôreût dîre ku l'ULg fouri m' prumîr èployeûr! Mès çu sèreût 'ne minte, ca dj'ovréve dèdjà à ç' moumint-là come djârdinî èt come animateûr du djônes po l' Céran.

Après mès studes, po m' ruhaper, dju prinda one an.né "sabatike", wice ku dj'ènnè prôfita po voyèdji (Italîye, Al'magne, Ôtriche), viziter dès-djins hare èt hote, acrèhe mès k'nohances an dèssin, aprinde l'al'mand, tûzer à çou k' dju voléve fé o m' vèye... Po fini, è meûs d'awoût' 1999 - sins mây aveûr sûcrî on-ârtike du gazète, mès sins-aveûr chômé pus' ku çou ki faléve po-z-aveûr sès dreûts ! - dju m' tapa come indépandant, "dèssinateûr" èt "djârdinî". Mins rad'mint, j'ouri dès k'mandes po dès magazines : Acta Humoristica ( po lès docteûrs), Syndicat (FGTB), Solvay Life, Witerthur News èt minme Le Soir Illustré... Et pwis c' one gazète : Le Jour/Le Courrier d' Vèrvîs... Adon-pwis, dju dèssina po kékes lîves po l's-èfants, one spéciâlité k' dj'aprèpa on moumint grâce à 'ne mêsse-dèssinatrice du Stâv'leû, ku dju m' fê co on d'vwêr du r'mèrci asteûre. Èt bin vite, dju diminuwa d'ovrer d'vins lès djârdins amon lès djins po n' pus fé ku d' dèssiner.

(SUITE EN CONSTRUCTION)

Abèye vès 'ne prézintâçion pus coûte!